Inisorat i Amai Ashraf

MAANA O SAWM:

So SAWM na basa Arabic aya ipmamaana tano ron na kapuasa a giyanan so katigra ko langowan a shai a pakabatal ko puasa a sarta o niat, iphoon ko kasbang o fijar (Suboh) na taman dn ko kasdp o alongan.
MGA ROKONO KAPUASA:

1.     Niat – o di kapniati so puasa na di khabalian.
2.     So katigra ko langowan a shai a pakabatal ko puasa iphoon ko kasbang o fijar (suboh) taman ko kasdp o alongan.
SO KOKOMAN O KAPUASAI KO BOLANA RAMADHAN:
Aya kokomano kapuasai ko bolana Ramadhan na wajib – paliyogat ago skaniyan so ikapat a rokon o Islam.

MGA DALIL A KAWA-WAJIB O KAPUASAI KO BOLANA RAMADHAN:
1.     Pitharo o Allah [subhanaho wa taala]sa Qur’an:
(يا أيها الذين آمنوا كتب عليكم الصيام كما كتب على الذين من قبلكم لعلكم تتقون). [البقرة:183].
“Hay skano a miyamaratiyaya na inipaliyogat rkano so puasa sa lagido kinipaliyogatnon ko siranoto a miyanga oonaan iyo ka angkano malk.” [2:183].
2.     Pitharo pn o Allah [Subhanaho Wa Taalah] sa Qur’an:
(فمن شهد منكم الشهر فليصمه). [سورة البقرة:185]
“Sa makamasa rkano ko kiyasoldo olanolan (Ramadhan) na puasai niyan.” [2:185]
3.      Pitharo o Rasolollah [Sallallaho Alaihi Wa Sallam]
(بنى الإسلام على خمس شهادة أن لا إله إلا الله وأن محمدا رسول الله، وإقامة الصلاة،
وإيتاء الزكاة، وصوم رمضان، وحج البيت من استطاع إليه سبيلا). [حديث صحيح]
Piyanagombalay so Islam sa lima: So kazaksii sa mataan na daa tohan a psoa-soatn inontabo so Allah ago mataana so Muhammad na siyogo o Allah, so kitindgn ko sambayang, so kitonayn ko zakat, so kapuasai ko Ramadhan, agoso kapnaihaji sa baitollah o taw a khaghaga niyan so lalanon.” [Hadith Sahih].
 
MGA SARAT A KAWAWAJIBAN KO KAPUASA:
1.     Islam – maana Muslim taw knao ba paliyogat ko kafir.
2.     Kiyabaligan – knao ba paliyogat ko da kabaligi ogaid na sonat so kapaka pphamuasa ko mga wata ka ansiran pkhalayam ka mbhalasan siran o Allah agoso mga loks iran.
3.     Adna akal iyan – knao ba paliyogat ko maliliwat.
4.     Khaghaga niyan so kapuasa.
SO MGA TAW A DI KAWAWAJIBAN KO KAPUASAI KO RAMADHAN:
1.     So pkhasakit – ogaid na khabayadan iyan bo makabagr.
2.     So pplayalayag – ogaid na khabayadan iyan bo makambalingan.
3.     So mahahaydh – ogaid na khabayadan iyan bo makasoti.
4.     So maninipas - ogaid na khabayadn iyan bo makasoti.
5.     So maogat agoso adna ppakasoson iyan a wata a mayto – aya kokoman iyan na amay ka aya di iran kapakap puasa na ikhalk iran so ginawa iran na pakabayad siran. Amay pman ka aya ikhalk iran na so wata iran na pakabayad siran ago makapkiparat siran (sa oman gawii na mapakakan siran sa sakataw a miskin).
6.     So didn pakaghaga puasa ibarato miyalok-loks odi na so pkhasakit a daa inam sa ba makabagr – da kiran paliyogatn ogaid na makapkiparat siran (sa oman gawii na mapakakan siran sa sakataw a miskin).
 
SO MGA BATAL O PUASA:
1.     So kakan a thibhabaan.
2.     So kainom a thibhabaan.
3.     So kapamakaya ko darodopa igira a kadawndaw.
4.     So kahaydh o bai.
5.     So kanipas o bai.
6.     So kapaki-injection
7.     So hijama
8.     So kapakatoron o mani a thibhabaan.
9.     So kanggowa a thibhabaan.
10.   So kada o akal sabap ko btang odi na kabrg.
11.    So kapniata ko kaboka.
12.     So kapmortad.
 
So Allah I lbia Matao
Wasallallaho Alaihi Wa Sallam