Inisorat-i Rasol Abbas

Asalaamu ‘Alaykom WarahmatullahI Wabarakaatoh

      ALHAMDULILLAH,  So langoa na Bantogan go Pod-podi na tanan dn Bagi-an o Allah I ,  Na so Limo go so kada a rayo-rayo a ginawa na san ko Pangolo tano a so Muhammad r so langoa manga Shahaabah niyan,  so manga familiya niyan na lomangkap ko langoa Moumeen a miangongonotan rkaniyan na taman dn imanto. Phangingko ko Allah I a palaya tano dn misampay sankaya a Olanonolan sa palay dn mapipiya ginawa tano na lalambo ko langoa a pphangasasakit a maka piya siran dn sa magaan so magaan ka aniran mambo minggolalan so manga soa-soat ko Kadnan tano sabap sa giyankaya a Kaphoasa na isaini a Simba a Inangkon o Allah I  a Rkiyan na “Sakn a Thigiyan i Mbalason”.
 
      Manga Oripn o Allah I ,  kalalayaman dn a oman pphaka talingoma so Ramadhan,  na pkha masaan tano a omani isa na tanto dn a massndod ko gii ran kapriparado ko pimbarang a pangan-ngkanan odi na manga pagigimo go manga lingao ko mata, a maa pd dn oto ko saka-sakaw tano sankaiya Olanolan a papatong non so Manga Shaitan na Llkhbanonon so manga Pinto o Naraka, na Llkaanon so Manga Pinto o Sorga.
 
      Giyanan so  manonompangon ko  manga BADAN / LAWAS  tano ogaid,  na aya mala a thalagadan tano, na antonaa i manga SIMBA a pnggalbkn tano a giyanan i bagianon o manga  NIYAWA  tano,  a amay ko maka talingoma tano ko Sabnar a Tohan a Mithaong Rikitano ko Samporna a Mapiya a Bontal, na aya mitalingoma tano ron na so dn so “Daa sanin-saning iyan a Poso”.

f       So Qur’an a Babarakatn, a aya Ompongan a Kitab o langoa manga Muslim sa Donya, na katawan tano a saya ini toron a mini pantag mambo ko LAYLATOL QADER,  na aya pakalaan tano ko manga oras tano  sankaya Olanolan na so kapphaganadaon, kaphmbatiya-aon na taman ko kasabota tano ko maana odi na Tafsir iyan, na samporna so kilangagn tanoron, na itataros tano dn ko manga pd a Olanolan…  Katawan tano pn a miya aloy sa Hadith a so satiman a batang a mabatiyaa kaon, na aya balas iyan na  Sapolo a Hassanah, na taman dn sa di khaitong ka ayabo a mata-o ron na so Tohan tano a Skaniyan so Al-Wahhaab, a Pphammgay sa daa Itongan niyan…
 
      Sa Omani isa na pagoradorad sa pakalaan tano so investment tano sa tolos Ihlas a parabo ko Allah I,  sanka-iya Olanolan a so Paganay ron na RAHMAH, na MAGHFIRAH so Ika-dowa on baad, na ITQOM MINA NNAAR so Ika-tlo ron bagi, ka an mambo makala a mambagi-an tano a balas a phoon ko Kadnan a Skaniyan pn so AL-LATIEF ago AL-KARIEM maana Lbi a Mananaw ago Maginawa sa taman a Maginawa.
 
Sabap sii na katii so pagaloyin tano a khabaloy a mosawir, a o masowa ini na mia tangkd so mala go madakl a kha CLAIM tano a balas san ko Masalamatn go Baralimo a Kadnan tano,  Insha Allah.
 
(Manga Pagariya sii rka nobo matitimo i kapagatora nio ko manga Oras iyo):
 
1.    Bapia antonaa i kap khaparo inkawon na pphaganadanka odi na phmbatiya anka so Qur’an, sa maito maito, ogaid na aya mapia a phakalaanon sa oras na sii ko kapaka zambayang tano sa Fajr odi na Asr.  Sii ko oman Waqto na taralbi pn so kapmbatiyaaon,  na afdal dn a matamat sa makaisa na ayapn o ba maka pira.
So pman so gopn pphamaganad, na phoon tano maganad,  na magihlas tano na mangni tano sa ilahaman tano o Allah I  sa malbod a kasowaa tano ron. Sii sa Hadith na dowaa balas a bagian o manga tao a gii maganad ko Qur’an. Paganay so karrgni ko gii mamaganad na ikadowa na so mia aloy a balas o omani isa a batang ko kaphmbatiya aon a Sapolo a Mapiya.
 
2.    O khaparo na paka ndakln so kapphamakin’ga ko Qur’an,  odi na manga Wasiat a nggolalan ko manga Cassette, CD, TV, Radio. Sii ko ka ddkha ka, sii ko kaada-a ko trak ka, odi na sii ko pd a libri ron so oras  ka ibarat igira ini lio tano so manga Familiya ko manga bndagan, darpa (beach) a gii phapaka rnggayan.
 
3.    O khaparo na opama ka daa galbk ka ko kagagawii na obanka lpasi  so manga Tarawih  ka tanto dn anan a manga ala i pahhala a ithatalagadon o Allah I,  oriyan na malo tano kksan so kapaka torog ko gii kaprasa-rasay ko manga simba igira gagawii sa sadn sa gagaon o ginawa tano.
 
Anday kapaka pasad tano ko basa tanoron a kaphowasa, SAHOUR sa basa Arab na iphnayaw tanobo ko Fajr na sadn sa pkha paro rka, TASBIH, Kapamatiya sa manga Islamic Books, Kabatiya sa Qur’an, kazambayang sa Sunnah… etc. na inggolalan tano, ka amay na bakadn tiorog na malpas ka so Fajr a isaini a mala a balas a kha kowaon.
 
 Adn a Hadith a piyagayona-yonan a so Dowa Rakaat a Sunnah ko onaan o Fajr na thomo a diso tagoo o Donya a balas siyan.
 
4.    Sii ko danka pn kapaka torog odi na sii ko kapkha paro inkawon  na bapiya maito bo a oras na phooninka a kip langagn ka ko Qur’an sa sii ka phoon ko manga bababa a Ayaht, ka dibo mathay na ilahaman ka o Allah I  sa kadaklan kaon, Insha Allah;   
 
5.    Oman ka phaka torog, na baloyan ka a olaola a kapphagitonganka sa ginawanka ko miya ipos a Gawii.  Pphaka sonngod rka ini  ko giinka kapanagontaman sa manga pipiya a Simba a ipphakarani ko Tohan tano a Samporna a Tomitikay.
 
Sa owadn a amad sa ginawanka a adn a mikharata a ginawa niyan rka ko manga siringan ka, na dinka phaka lpasa sa pira gawii na pangani kaon sa Rila. Ompman o adn a danka mitarotop ko giinka  ka zoa-soata ko Allah I, na nggagaaninka so kamaapi Niyan rka sa pakan daklangka so Tasbih a “أَسْتَغْفِرُ اللهَ الْعَظِيـمَ” ka sigurado a Maapan ka Niyan asar a dinka mbabalinganan, ka Skaniyan so GAFOUROR RAHIEM.  So Rasoulullah r na aya minos a kapphangni niyan sa Rila ko Allah  I  na minos so Maka-Pitopolo (70x) oman mabasa alongan.
 
Tatanodingka a so kapanago tiyapa ko rata a ginawa ko tonganay-di-tonganay na iphaka naraka. Mia aloy sa Hadith a Tlo bo gawii a dimaka mbitiyara-i so DOWA a magari ka poonan sa RATA-A ginawa, na o kapantagi siranon a kapatay a di siran maka PRILA-I na Tao siran ko Naraka Jahannam. Ogaid na Sadn sa mangorao odi na  mangonaan ko kapaki pngginawa-i na ron so Balas o Allah I, a tanto a madakl.  Sa owadn a phangni rka sa Rila ko bapiya antaa na Rila-inka ka miyakowanka so balas a tanto a madakl. So Allah I na gii niyan Tharoon a kambgi niyan sa tanto a madakl a kalbihan ko Oripn iyan a mapasang i kapririla  ko manga pagari niyan.
 
6.    O khagaganka na onaan o danka pn kapaka torog,  na rila-inka so langoa mikharata on a ginawanka ko miabasa alongan sa bapiya antonaa kia okitian.
 
Adn a Hadith a … Adn a sakatao ko manga Shahabah a tiankd o Rasoulullah r  a “Sorga” ka aya isa a olaola niyan na oman gawii ko daon pn katoroga na tomapnay sa poro na tharoon niyan a Hay Kadnan ko na Zaksii nka a sadn sa mikharataon a ginawa ko,  mlagd o mapayag odi na ibno rakn ka ibarat o miyamaganta rakn sanka-iya alongan, na Zakasi-inka Ya Allah a imanto na rinilaan ko siran sa diran rakn dn bayadan ko Alongan a Kaphangokom, sa Rila-inka siran ka Ska so Patot go Pkha Babayaan Ka so Kapririla (Piagoyona-yonan).
 
O manggolaola ini ka lomangkap aya OLAOLA na sigorado so kambagi-ana tano ko tarotop a kalilintad ko manga Ingd tano,  go isaini a kasankapan a kapphaka bagr o gii kanggiginawai ko Islam a kakha adn o Bagr a Kaisa-isa o kadandan o manga Muslim, Insha Allah.
 
7.    Kowaanka a olawla a madadalm ka dn a ABDAS  ko manga Oras,  ka matatatap ka mambo ko kapananggila, go so manga ito-ito a simba ka datar o kapanasbih lalayon na masisiyap ka dn.
 
Aya piyagayonayonan a mapiya tasbih sanka iya Ramadhan na “ ALLAHOMMA INNAKA ‘AFOOWN KARIEMON TOHIBBOL ‘AFWA FA’FO’ANNAA”. Pangdgn so Arabic aya ka so kabalsian phiya pia na aya taralbi….
 
Aya pn a mapiya go taralbi go mala-i balas a ipphanasbih a khioman ko  kialayaman tano a manga Tasbih na so manga Ingaran o Allah I a Siyaw-polo ago Siyaw…
 
8.    So kapag Umra go ka Ziyarah na taralbi ko matatago sii sa Kingdom a omani Isa, na maka isa iran aya minggolalan ka tanto ini a manga ALA i balas a simba,  ayapn o ba maka pira…
 
So pman so sii matatago sa lio a Kingdom  na dipindi ko kapkha gaga-iranon… Ogaid na taralbi mambo ko siranoto a lamba-lomamba a kinggolalann niran saya ka isa-ini a kaphaka arap o tamok iran.
 
9.    Layamanka go papaliogatinka a ginawanka a so manga paralo a Sambayang na ayadn a kipthomann kawon na barajuma a sii tatap ko Masjid. Tanodan tano ka so sambayang a Barjuma na maoo-ona sa 25 to 27 ka daradat ko sambayang a tinanggisa. Go pipikiranka a thomo pn so ka-aawat ko Masjid ka oman i salakad a pkhi lakad ka ko Masjid a pzambayangan ka na satiman a MAPIYA.. (Hadith)
 
10. Phooninka so giinka kazambayang sa TAHAJJUD ko kapkha gaga ankaon, na obankaini lpasi ko Sapolo gawii (10) a khaori ko Ramadhan ka sigorado so kiyapd ka ko gii kazalaka ko  LAYLATOL QADR, a so balas o miyaka pagamalon na thomo a diso Sanggibo a Olanolan. So manga DOWA’A ko bapiya antonaa i Phagnin na sii mapiya a ipphantag ka giya-i so Oras a kapphananawag o Kadnan tano a Baralimo go Bararizki, sankya a langit a tomampar sa Donya a “Sadn sa Phangni ron sa Limo, Rila goso manga Pd na Imbgay Niyanon”.
 
11. O khaparo na owana katawan ka a manga Ulama odi na manga Barasimba a siran so manga Baratapa sa Amal,  na phooninka so giinka kiran kapaki mbolayoka odi na kapaki plomammka ka an pkha sompati odi na pkha omani so Sowa aka ko Islam….. Pd sii so kaphagamong tano ko manga Taalim odi na manga Mohadarah a phagadnn o manga siringan tano…
 
12.  O khaparo na phooninka a kapaka ozora ko Parangay a manga pipia ibarat o kapphanabang ka sa mokit sa maito a pirak,  katharo go galbk ko bapiya antaa pagarinka odi na gropo a Muslim a maka khakailangan.
 
O siinka phantagn so kipthonayn ka ko Zakaht o tamok ka na pakalangkapan ka ko miya aloy sa Qur’an a Walo a Benificiaries (SINIP), sa aya kaphaka okitanka sii na so thigiran a so iphmbgay o Kawanan na didn katawan o Diwang.

So Maporo a Lima a thigo Rasoulullah r na thomo a diso mababa a lima. Sa o dinka khagaga so kambagi-bagi sa manga pangnnkn ko manga siringan ka na khasanaan dn so matag IG, odi na pira timan a TAMR (O adn) a tolos Ikhlas a giinka mang gomon ko tonganay dinka tonganay, a katawan ka a daa rkiyan.
 
Ikapdi tano so manga Familia o Allah ِI a siran so manga Miskin odi na manga Fakir, sa ditano kiran panganogonan so maito mala a ogop tano kiran ka an siran kaloloagi ko gii ran kakhawiyagan. Go bapiya daa khaparo pasin a khi palad tano kiran ko gii ran rkitano kapagino-ino na di tano pphanakitn a ginawa iran sa makandod siran sa makapipiya ginawa iran sabap ko kapia katharo a miyan’g iran rakitano.

Sadn sa tao a mapaka inomiyan odi na mapaka kan iyan so gii phowasa ko oras a IFTAR na miaka kowa sa balas a lagid o balas o gii phowasa, ogaid na kna oto a ba khalbat ko balas o tao a miapaka inom odi na miyapaka kan ka (Hadith).
 
13.  O khaparo na phooninka a mapd ka ko Da'awah Islamiyah. Pangpd ka ko bapia antonaa gropo a gii manampay a siran so pzogo sa kanggalbk sa manga pipiya na pzapar ko manga piyaka sisingay a Galbk. Sa aya panompangan ka na so manga tao a aya kkdgn iran na so dn so Qur’an a go so Hadith o Rasoulullah r a aya kalilid go poonan a kiyasabotaon go so kia pamagosayaon na sii miakanggolalan ko manga osayanon o manga o Pat Katao a manga Shahabah Niyan. Giyanan so aya Aqeeda odi na Kpit iran na so Ahlu Sunnah Wal Jamaah, Sunni ko kababa iyan.
 
14.  Arap sa oba ka mabaloy a pd  ko manga tao a Miyamananggila (Muttakoon) na pananggila inka sa oba makala so oras ka ko manga TV odi na Radio Programs a daa khinggay niyan a gona ko kababoloi nka a Muslim;  Kapamakin’g  sa manga ida-ida, odi na bayok a kna ba ka-iislami;  Kaphmbatiyaa odi na Kaphagilaya ko manga toladan a inisapar o Islam.
 
Isawon na makawatan tano ko manga kalilimod go kambibitiyarai a aya pka imponan non na kapamaganta odi na kapanotiya ko manga Pagariya. 
Dadn da a mababaya sa baniyan kana so SAPO o pagari niyan a MIATAY. Ogaid na o ditano mapitiya a ginawa tano ko Kapamaganta na izan dn o kiyan tano so Sapo o pagari tano a piyamaganta tano. Sa IKAGOWAD TANO AYA….
 
Palaya ini phaka kks ko manga balas a pipikirn tano na aya mala na oba badn maka sogo sa ditano kitomann ko manga Sunnah samporna ko manga Wajib a pnggolaolaan tano,  na INA-OO MANGA PAGARIA… disa didn ka Pagodas Rkitano ankaya  Ramadhan sa dibo ini mathay na kanogon niyan na kazndit sa oriyan amay ko maito a masokat tano ron…
 
15. Sa omani isa na bagowi niyan go takpi niyan so gii Kanggiginawa-i, Kazisiapa Khatatabanga,  sii ko Agama, go ponas sn tano ko manga POSO tano so HASAD Kasiig ko salakaw-di-salakaw kagiya so kasiig a thigo Nabi tano,  na pkhatotong iyan so manga pipiya a Amal sa datar o kapkhatotonga o apoy ko itagon.
 
16. Aya phaka oriyanko sii na so KAPAG-ITTIKAF sii sa Haram odi na sii ko manga Masjid a marani rkitano, ko khaori a Sapolo gawii a giyanan so ITQON MINANNAAR, sii aya taralbi ko manga pagariya a khasorot so orasiran.
 
      So Ramadhan na “PAGANADAN” na siyapn tano so mininda-o nian, maana mabaloy a ayatano dn baloyin a olaoola odi na parangay ko gii tano kapagintao, ka miyatatap so kapapatong o Shaitan a Pimorkaan a ditano nian dn maorarig ko manga was-wasian, na go miyatangkd mambo so kallka-i rkitano ko manga Pinto o Sorga a manaros tano rondn ko bapiya antonaa gawii, oras a kapagndod tano san ko Makalimoon go Masalinggagaon a Kadnan.
 
Wakullo ‘Amin Wa Antom Bi khayer  …
 
Go Pphangnin tano ko Sabnar a Kadnan a Pmbgay ko Kapipiya Ginawa,  a Omani Isa na palaya dn misampay ko
phamaka talingoma a Ragonan sa palaya dn
mapipiya ginawa tano langon
 
Ameen Yaa Rabb
 
  
Manga Pagaria, sompat o amal iyo a manga pipia a sampain nio aya ko manga PD a pagariya